عزيزعذاره (محمد بوستة )

عزيز عذاره
خطا كسر درناله عليه نذاره
فيهن وما فيهن

عزيز انريده
ويريدني علي رايه انجي تحديده
والطير المجوع ما يسيب صيده
حتى لو رقا وسط السحاب توارى
الا العقل ما جادات عليه جديدة
ولا غير هذي ما عنده ولا خباره
خبارة غلا ماضي امعاني كيده
ولها وقت في حلو الرياق امراره

مو متحول
امعاي بالسوايا ديما ايعول
تحلف علي خيمة رجاي امخول
واخذ وصاية من جناب اكباره
وخلا غلانا وطن شين امدول
واذيابه علي فجوة خلاه غفاره
وهو كان للهايف ذرا وامول
وعامر جباه بعزوته وامياره
بومه علي حيط النضيد اجول
وردمن معاطهينه وطفيت ناره
ونا مازالت نحسب في خلاه امفول
علي احساب ما ينكب الجار لجاره
وصابر علي عازة وياس امطول
وانقول في عزيز الدي موش اخسارة