مهدي بشير التمامي [ياطيف البعاد]

ياطيف البعاد .. ياواساد عينى عالوساد .. بالك ساد

*-*-*

يازاير الظلام .. ياامخلوط فى وهم الاحلام
ياطرطاش حتحات العزام .. وهو من البخث كمشه م اللماد
يامازاى مقرون الرمام .. يافتاق فاهق للغداد
ياذواب لاغلاظ الركام .. على مبذور درته بالكداد
رجيت ايام واتالن ايام .. عام كبير حن الله وجاد
هينع طاب صابه للمام .. اسبوله صب يحنى فى العواد
بين ايدى لطنه اقسام .. لى الزرع ولغيرى الحصاد
*-*-*

ياقاطع الوصيل .. ياواصال عينى ليل ليل
ياطياب عينى ع الرحيل .. ياجاهاد فى عمرى اجهاد
ياهداد ماعاد فى حيل .. ياقناد عقدات العقاد
يارماش لابهار الفتيل .. ياغراب روحى فى البلاد
ياسيال دمعى سيل سيل .. لاله برق شير لا ارعاد
اثريته ويل يتلا فيه ويل .. انقالب فيه مابا للبراد
ايفوتك ليل وايقولن الشيل .. خلاص عفاك وانزر للرداد
نهيم نصيب وايفز الدليل .. بحر الرمق يلوى للعواد
يجى ع القيس الاول مايميل .. ايبدل على الجراير فى المقاد
مانحساب نوطا بالثقيل .. على التربان واينوض الزناد
*-*-*

ياطيف العزاز .. ياعكار صفوات المزاز
بالك ظلم نوم العين لاز .. وهى بالغصب طابت للرقاد
وايسناه صوبك وين باز .. ودرنا درب ماعاد له ارداد
دون غلاك مامن ظرف حاز .. طعنا غب هكى الله راد
كسرى فيك كى كسر القزاز .. اللى لاجبر بعده لا اسعاد
*-*-*
ياطيف الا ولاف .. خاف الله فيهن ياك خاف
امشرفهن انظارى ع التلاف .. ياك خلاص خالص بالزياد
جفاك اكتاف يلوى بالكتاف .. وجى اطياف زولك ليه عاد
اللى ماقاس يحسابه اقطاف .. ولظم كلام طايب للرداد
وهو مجماج قصقال الحساف .. طويل وما ايحودد له احداد
*-*-*
ياطيف القديم .. ياعطاب لجروح الصميم
يانباش لردوم الرديم .. بيش اتسال عينى والعباد
هى تنهال من جيك اتصيم .. حرام ابعدك ماتاطا هماد
ع الكفاف تنزح للجهيم .. وهى بالحس تومي بالامعاد
ضيمك فى يغسل فيه ضيم .. وظلمك ظلم سوده من السواد
جت فى الكتر والقاضى خصيم .. وانت جيت فى روس الاشهاد
اتبع فى معاكير الرجيم .. وعقلك لق للشينه انقاد
حكم لك بالنعيم ونى جحيم .. برم بستار جوفى والافاد
*-*-*
يا طيف البعاد .. يا وساد عيني عالوساد .. بالك ساد ..؟

ياطيف البعيد .. بالك حيد غادى ياك حيد
طالق فى جواجيه صهيد .. يامرماد كبدى فى الرماد
امقيد هذب عينى قيد قيد .. ياامعقود فى ركن الهماد
مزارك كيد يتلا فيه كيد .. الهن ماعاد عندى الهن اعداد
عليهن مايجد ولا جديد .. ايبات نكاد يصبّح انكاد
ونبدا اوحدى فى الدنيا وحيد .. من العباد تعزلنى اعباد
انهيم نصيب ع الريم وشريد .. انخش سواد خالط فى سواد
انجى للوهم بحرار الجهيد .. نفسهن دوب مايلقى ارداد
انخطى ع الجراير مانحيد .. انخاف اخطاى تاطا فى الاصهاد
وسع الكون ضيق ياطريد .. انجى ع القيس دارب م العواد
انهمبر فى حيارى من جديد .. وننشل ركن دلوى م الادراد
انرقع فى بياده بيد بيد .. الله الله يابايد بياد
ارياه على مافيهن سديد .. اقلود العقل مابن لل????
ايسكرف لاهجار ولا وقيد .. ولا دبار عنه للمقاد
انقص اخطاه فى الرده انكيد .. ونيس فى امجيه والرداد
انهضب فوق مصقول الحديد .. من الملال نرمى ع الرشاد
نصيب وهو يجافينى المديد .. انفز ونى امجلول م الابراد
خطانى يا اموكر فى الرويد .. موش خلاص لطنك اسعاد
وموش خلاص لقط بالعويد .. ربيع غلاك واوهامك كساد
وموش اعبيد تركهن الزيد .. اثمانك زطلوهن للزهاد
وموش ابعدك بالحال النكيد .. اتناصف فى ايامى بالعداد
حيد حيد غادى لاتزيد .. عزمى ع الكواين ماوباد
يالوكان ماو طيرك فريد .. مان اقسام دنوك جن اطراد
يمشن شبح عينى صيد صيد .. ويرقد صبع قسمى فى الزناد
*-*-*
ياطيف البعاد .. ياواساد عينى عالوساد .. بالك ساد ..؟