مازال يا شراقا تندهو تلقونا***وعارفينكم في الجد ماتخلونا
عارفينكم تراسا... ومن حق فارسكم يعللي راسه ...
ابطال فاالحروب ارزان فالسياسه... في قاموسكم ماتعرفوش الخونه
كبير فضلكم علي الوطن مايتناسا... ومازال ليكم ناسنا ممنونـــــــه
انتم الهادا الوطن خيرة ناســـــا... غلاكم كبير وناسنا ماتهونــــه
ماكم لقايط كيف هـــــالخلباصه... اللي وين فجاءة تحررو نكرونا
اللي قبل كانو يزمزكو رقاصه ... احنا عايله والطاغيه هو بونا
انتم عز دوم لوطنا وحراسه... معروف صيتكم في وطنا ومادونه
وبنغازي الحبيبه الطاهره الوناسه... بدت عاصمة لقلوبنا الحنونه
زنتاني بشعره يوصف في احساسه ... بمشاعر وفيه في خاطره مدفونه
ونرسل سلامي لشرقنا ولناسه ... وفي الرد نرجا ان كانهم سمعونا
مازال ياالشراقا ... في وقت الفزع رانا من البنداقا ...
وان طق طبلكم فيسع انجو سباقا... علي شانكم لو نكملو ويفنونـــــا
لاجل خوايا بينا وعلاقـــــــــا...علاقة محبه صافيه وموزونه
وعلي قلب واحد سايرين رفاقا... رفقة اجواد موثقه ومضمونه
رفقة تريس وقاهره البقباقا... وخلت الحاسد كبيدته مسحونه
شاعر ابياته خاطها في اوراقه... لكن غلاكم حاطه في عيونه
وعلي بعد المسافه نجددو لملاقا ... واتجوكم تريس وبالتريس اتجونا
ووديان المحبه بينا دفاقـــــا ... صلا عل النبي بالعين لاتضرونا