حوار بين مجموعة من الشعراء

حوار بين مجموعة من الشعراء بعنوان الغربه
البداية مع ابوجلاوي
ليل وغربة ...وخطور من ترجى العين فقربه ... مازال خاطري
مابين موح دياره... ومرجاه من صابغ سواد انظاره
بودور عالخاوي اسفي جرجاره
وحساد يجروا بينا عالخربه
مني ايريدوا يقطفوا نواره
خلاص يقطعوا منبوتنا مالتربة
ومازال ماطفين لهايب ناره
قديم صوب ماني دايره عالطربة
غلا سمح ياصاحب غلا باقداره
قدام الخلايق كلها نفخربه
ويبوه كل حد حبله علي جراره
وماي ساهلة عالطير يترك سربه
يسهل علي الصياد والدواره
وحتى الرصاصة الطايشة تغدربه
ليل وغربه
*********
رد الترياق وقال:
بين اخطوره ... وبين غربته عني جميل الصوره
وبين ليل مايبي يقابل نوره
عاش التعاسة خاطري واستربا
امعاي عاكسة يادنيتي مشكوره
عطشان ما منك اطمعت بشربه
ليل وغربة
*********
رد أصيل وقال :
ما بين ليل طويل
وخطور بوسالف ايميح جميل
اللي اليوم من فرقاه ريت الويل
والدمع عالن عالميامي حربه
نازل علي الخدود داير سيل
ما عندنا منه نجا لا هربه
ليل وغربه
*******
رد سيف عقوب وقال:
ليل وغربة
مازال خاطري مابين ليل وغربة
وخطور من تراجي العين ساعة قربه
بين اوهامه
وبين غربتي ودمعي ولط اقسامه
وبين ليل ما فارق شديد ظلامه
وبين ياس متعصي ومعلن حربه
مرايف علي قربه كحيل ميامه
فراقه صعيب وحالتي في كربه
حتى ان جفاني ما نطيق خصامه
رفاقه انظلوا دربنا هو دربه
مازال خاطري مابين ليل وغربة
وخطور من تراجي العين ساعة قربه
ليل وغربة
**********
وقال: توفيق الحاسى
ليل وغربة ...وخطور من ترجى العين فقربه ... مازال خاطري مابين
فرقة غــــــــــــــــــــــــــــــــــــالى
تباعدت عنه ما ابقــــــــيلى والى
تميت ندعى فى الكريم العـــــــالى
ايعجل احضوره وما ايوخر دربه
غالى عليا وما اقـــــــدرت انوارى
مطرا منام الليل اللى نـــــسمربه
محال ما ننسا جمــــــــيل الطارى
ولايوم نشقى بغــــــيرها ونغدر به
لا انسيت غالى ولا انسيت اديارى
واخذ خيالــــــــى وكل ما نشعر به
ليل امطـــــــــــــــــــــــــــــــــول
وبعاد مولى بو غثيث ايهــــــــول
اينغص على الخاطر ابقى يســول
طالب حنانك ما ابقيلا هـــــــــــربه
تميت حايس وين ما نجـــــــــــول
كما طاير ومهاجر امفارق سـربه
نار حنــــــــــــــــــــــــــــــــــــــــينى
وشوفة الغايب بيه نمـــــــــلأ عينى
ايحوس خاطرى وان المنام ايجينى
ونبقا اتلون كيف طيف الحــــــــربه
يخطر عقاب الليل وايسليــــــــــنى
تمنيت ما عمرى انــــــــفارق قربه
ليل وغربة ...وخطور من ترجى العين فقربه ... مازال خاطري مابين