أشقي بسريبي .. للشاعر صالح بوعياد الشهيبي

أشقـــــــــــي بســــــــــريبـــــــــــي
مــــــالقيت لا والـــــي أشقي بسريبي ... وأنتِ صهـــــد ناري ماتريــــد تطيبي

أنهندب بطــــــولــة عامــــــــــــــــي ... علــــي أرياحهم زاحن وثوق أرمامي

الحييّن ماسالــــــوا عليــــــه كـــلامي ... ونا مــــاشغلت أمــــــوات بتهنديبي

وحايس أنلمــد فــي عقاب حطامـــي ... ومـــا أتجدّ غيــر اللـــي سبب توكيبي

وحالم منــــام وفســــروه منامــــي ... لقيوا بنت عمّـــي مـــاتكــون نصيبي

م الياس والجضـر نا مالقيت محامــي ... ويا أطعمه تمّيتـــي خــــلاص تغيبي

وهن في غلاي يمرمـــدن قدّامــــــي ... وأقريب يعـــوّي في القوايـــل ذيبي

واللي نهندسه مرمى , يجيني رامي ... واللي نديره ذرا نلقــاه مستذريبــي

مــــو حـــــــــــــد مــــــــــــابــــي ... مــــروّه يـديــــر وينشغل يشقـــــابي

نين أوّلي يرجى يجيه عقابــــــــي ... ونيــن ياطريق نعـــــــرف منين تجيبي

والسكات خيرلي مالي عليش انّابــــــي ... غمّاز فـي ظلام الليـــــل من داريبي

في عياط واجد نا عياطــي غـــــــــــابي ... وذان لطرفي صمّــن وذان قريبي

عنّــــــــــي ونــــا ذاهب علي مهلابي ... وما القيت مـــن يقــدر علي تهليبـي

وزماني بـــرم ع اللــــــــي عليهم عابي ... القيتّم ايراجوا في عطاء من جيبي

ونا الهن زمان امحتحتا اجرابــــي ... وغرزن وكافيهـــــــــن اقـــــداح حليبي

واللـــــي عليـــــه رميت نـــاض رمــــابي ... علـي ناس زاريبهـم اللّي زاريبي

وليّــــــام مــــــــرّه ينهشــــــن جلبابي ... نيــــن يضحكــن تمّن علـي تقشيبي